Azeri deyilem Turk oglu Turkem

Duysun bütün dünya, dinləsin aləm,
Azəri deyiləm, Türk oğlu Türkəm!
Keçmişim şərəfli, şanlı, möhtəşəm,
Azəri deyiləm, Türk oğlu Türkəm!

Kökənim Oğuzdu, adım, sanım var,
Dədə Qorqud kimi bir dastanım var,
Molla Pənah Vaqif, Cavad xanım var,
Azəri deyiləm, Türk oğlu Türkəm!

Mən Əhməd Cavadam, sevda başımda
Mən Rəsulzadəyəm, Vətən peşində
Müşfiqin ruhuyam, cavan yaşımda
Azəri deyiləm, Türk oğlu Türkəm!

Mən Şərqin üzüyəm, Güneyin səsi,
Şimalın və Qərbin isti nəfəsi
Mən Şuşa, Kəlbəcər, Laçın naləsi
Azəri deyiləm, Türk oğlu Türkəm!

Gör Odlar Yurdumda kim oynadır at,
Satqını qəhrəman, dini mövhumat,
Məndə bir yurd eşqi, sənət, şeiriyyat,
Azəri deyiləm, Türk oğlu Türkəm!

Bizim sevdamızı çoxları bilməz,
Vətənim bölünməz, Şəhidlər ölməz.
Bir yüksələn Bayraq, bir daha enməz,
Azəri deyiləm, Türk oğlu Türkəm!

Dinim İslam, dilim Türkdür, özüm Türk,
Düşməni yandırıb yaxan sözüm Türk,
Şanlı tarixim var, yolum, izim Türk,
Azəri deyiləm, Türk oğlu Türkəm!

Nəbiyəm, Bozqurdam, Qoç Koroğluyam,
Nə fərqi haralı, hansı dağlıyam,
Mən Türkəm, mən Azərbaycan oğluyam,
Azəri deyiləm, Türk oğlu Türkəm!
Azəri deyiləm, Türk oğlu Türkəm!